Градот беше исполнет со детска радост - повторно „Априлијада“
ЈУ. Детски културен центар „Карпош“ под покровителство на Град Скопје на 1 Април 2026 година, од 10:30 до 14:30 часот во Градски трговски центар А.Д. Скопје повторно ја организираше традиционалната детска манифестација „Априлијада“ 2026.

Во рамки на програмата имаше ревија на маскирани деца од градинките и основните училишта, ученици од основни училишта со танцови точки кои ја збогатија атмосферата со динамични и ритмички кореографии. Програмата продолжи со настапи на балетската секција при Детскиот културен центар – Карпош пропратена од солисти - деца изведувачи на песните од ЗОО Азбука, балетското студио Бреак А Лег и Марбал и златните славејчиња, како и Театар за тебе кој имаше своја изведба.
Посебна атракција за посетителите беа настапите на кловновите со диско забава и театар со кукли, маскотите од познати цртани филмови како и пантомимичар, кои преку интерактивна забава и хумор создадоа вистинска карневалска атмосфера и ја раздвижија публиката. Публиката исто така имаше можност да ужива во уникатната изведба на сегменти од познатиот детски мјузикл „Аладин и волшебната ламба“ изведени на македонски јазик од студиото за деца и младинци Бродвеј јуниор.
Манифестацијата свечено ја отворија директорката на ЈУ. Детски културен центар „Карпош“ д-р Билјана Лалчевска Серафимовска и градоначалникот на Град Скопје Орце Ѓорѓиевски, кои со пригодни обраќања ја отворија оваа детска манифестација под маски.

Настанот беше наменет за деца, родители и пошироката јавност, а има за цел да ја поттикне детската креативност, уметничкиот израз и духот на сплотеност преку музика, танц, театар и хумор.
На манифестацијата беа доделени дипломи и награди на ликовни творби и маски кои пристигнаа во ДКЦ „Карпош“ на конкурсот кој Центарот го објави до основните училишта. Исто така беа доделени дипломи за учесниците и гостите од основните училишта и градинки кои продефилираа на бината во прекрасни маски.
Изразуваме голема благодарност за поддршката од Град Скопје, ГТЦ-Скопје, основните училишта, градинките и на сите посетители кои направија оваа манифестација да биде весела, да се шири радост и насмевка на оваа детска манифестација.
Едноставно, Априлијада беше забава за сите генерации.